లవంగం జన్మస్థానం మొలక్కన్‌. లవంగాన్ని 1800 సంవత్సరంలో మన దేశానికి పరిచయం చేయడం జరిగింది. మన దేశంలో కేరళ, తమిళనాడు రాష్ట్రాల్లో పంట విస్తరించి ఉంది. భారతదేశ లవంగానికి మార్కెట్‌లో మంచి ధర లభిస్తుంది. 

ఉపయోగాలు : 

  • లవంగ తైలాన్ని (యూజినాల్‌) సబ్బుల తయారీలో, పరిమళ ద్రవ్యాల తయారీలో వాడతారు. 
  • లవంగ తైలం యొక్క ఏంటిసెప్టిక్‌ గుణం వల్ల టూత్‌పేస్టు తయారీలో వాడతారు. 
  • లవంగంను వంటల తయారీలో వాడతారు. 
  • ఇండోనేషియాలో లవంగాన్ని పొగాకుతో కలిపి సిగరెట్‌ తయారీలో వాడతారు. 

వాతావరణం :

లవంగ వృక్షాలు తేమగా ఉండే ఉష్ణమండల వాతావరణంలో 100-200 సెం.మీ. వార్షిక వర్షపాతం నమోదయ్యే ప్రాంతాల్లో మరియ సముద్ర మట్టానికి 1000 మీ. ఎత్తు ఉండే ప్రాంతాల్లో బాగా పెరుగుతుంది. బాగా తేమగా ఉండే వాతావరణంలో లవంగం చెట్లు పుష్పించవు. తడి మరియు పొడి వాతావణంలో ఒకదాని తరువాత ఒకటి ఉండే ప్రాంతాల్లో బాగా పెరుగుతుంది. 

నేలలు : 

సారవంతమైన గరప నేలలు లవంగం సాగుకు అనుకూలం. ఇసుక నేలల్లో దీని సాగు కష్టం.

ప్రవర్ధనం : 

లవంగంను విత్తనం ద్వారా ప్రవర్థనం చేస్తారు. విత్తనాలను పండిన ఫలం నుండి వేరు చేసి నారుమడిలో విత్తుకోవాలి. నారుమడిని నీడలో ఉంచాలి. 1-1/2  సంవత్సరాల వయసుగల నారును ప్రధాన తోటలో నాటుకోవాలి. ప్రధాన తోటల్లో 6 మీ.I6 మీ. దూరంలో నాటుకోవాలి. 

కోత మరియు దిగుబడి : 

సాధారణంగా లవంగం 8-10 సంవత్సరాల తరువాత పుష్పించి కోతకు వస్తుంది. లవంగ వృక్షం 7-15 మీ. ఎత్తు వరకు పెరుగుతుంది. జింజిబర్‌ లవంగాలు 4-6 సంవత్సరాలలో కోతకు వస్తుంది. పూ మొగ్గల శాఖ యొక్క కొనభాగంలో చిన్న కొనలపై ఉత్పత్తి అవుతాయి. మొగ్గలు లేత ఎరుపు రంగు మారగానే సేకరించాలి. మొగ్గ పూర్తిగా విచ్చుకుంటే సుగంధ ద్రవ్యం విలువ తగ్గుతుంది. కాబట్టి మొగ్గ విచ్చుకోక ముందే సేకరించాలి. లవంగం చెట్లు 60 సంవత్సరాల వయసు వరకే దిగుబడి ఇస్తుంది. ఒక చెట్టు  నుండి సుమారు 40-50 కిలోల దిగుబడి ఇస్తుంది. ఎండిన లవంగం సుమారు 4-5 కిలోల వరకు వస్తుంది
 

రచయిత సమాచారం

ఎ. నిర్మల, డా|| యం. వెంకటేశ్వర రెడ్డి, డా|| బి. నీరజ ప్రభాకర్‌, డా|| ఎ. మనోహర్‌ రావు,  ఉద్యాన విభాగం, వ్యవసాయ కళాశాల, రాజేంద్రనగర్‌, ఫోన్‌ : 8330940330